絲絲講場：馬斯克辭職要公投問用戶

為咗收購社交媒體Twitter，曾為世界首富嘅馬斯克（Elon Mask）可謂付出高昂代價！事緣呢單收購所需資金龐大，搞到呢位富豪為咗「撲水」要拋售所持旗艦公司特斯拉（Tesla）嘅股份套現，拖累特斯拉股價大跌之餘，個人身家亦跟隨大幅蒸發，致失落首富寶座。同時，呢位富豪一身難兼兩職，結果兩頭唔到岸，順得哥情失嫂意，特斯拉班股東群起叫佢呢位行政總裁（CEO）退位讓賢。不過，向來「寸寸貢」嘅馬斯克又搞新意思，唔知又想打咩主意！

逾半贊成唔做Twitter負責人

所講嘅係近日馬斯克發起網絡公投，徵詢Twitter用戶，佢應唔應該辭去Twitter負責人一職，又話會遵循民調結果。事實上，上個月馬斯克確曾向特拉華州法院表示，將減少喺Twitter嘅時間，並最終尋找一名新嘅領導者管理公司。

Twitter近日更新政策，禁止單為推廣其他社交媒體公司而創建嘅帳戶，以及包含競爭對手平台嘅連結或用戶名嘅內容。喺網上投票開始前幾分鐘，馬斯克表示歉意並發表貼文，話今後將對類似嘅重大政策變化進行投票喎，咁公司業務吓吓都要等網民公投，又真係幾新穎嘅，但行唔行得通，係另一回事啦！

據報上述網絡公投，有逾1,700萬名Twitter用戶投票，約58%認為佢應該辭職。大家就擔定櫈仔等睇戲，睇吓呢位富豪係咪言出必行，辭去Twitter CEO之位！

余絲韻

「東網Money18」fb專頁：有討論、有分析，齊來FUN享，贏盡●你Like

Money18更多即時港股指數資訊