昔日東方絲絲講場：大行教路幾時暢韓圜最抵
新年就到，絲絲同大部分打工仔一樣，一拎到出年月曆，即刻逐頁揭下邊個月公眾假期最多，可以去旅行嘛。眾所周知香港人最喜愛遊日本，大家都留意到今年Yen不斷貶值。南韓又點呢？事實上，韓圜近期雖然因為美元回落已些微反彈，但兌每美元由年初至今亦累貶約10%，幾時先再係暢Won好時機？德意志銀行駐首爾固定收益及外匯主管崔敬真（音譯）就話，下季韓圜兌每美元或低見1,380，其後則有可能重上至1,100水平，即係去年中高位，即每萬韓圜上返去70港元！
低吸時機或轉瞬即逝
韓圜今年喺美元強勢下當然跌多升少，10月13日韓圜兌每美元更曾低見1,447.88，即每萬韓圜弱見54.21港元。不過近期已由低位反彈，上周五韓圜兌每美元報1,319，每萬韓圜兌約59港元。崔氏話如果年底市場交投淡靜將會加劇匯率波動，韓圜兌每美元有機會見1,350水平，成為吸納嘅好時機。
不過要注意低吸時機轉眼即逝，事關佢認為明年有唔少推動力令韓圜反彈。其中，美國聯儲局減慢加息步伐為包括韓圜在內嘅新興市場貨幣帶嚟支持，加上如果南韓國債一如預期喺出年納入富時世界國債指數（World Government Bond Index，WGBI），韓圜升勢有望比其他貨幣更凌厲。
南韓財政部預計，最早明年3月會有WGBI結果出爐，當地債市有望吸引90萬億韓圜（約5,348億港元）外資流入。不過，崔敬真指，韓圜亦存在唔少潛在貶值因素，包括半導體價格潛在調整風險，以及南韓最大出口地中國嘅經濟有機會進一步放緩。德銀睇明年底韓圜匯價同現時差唔多，都係兌每美元喺1,300左右水平，即每萬韓圜兌約59港元。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
