昔日東方絲絲講場：友和迎冬入定貨 禦寒品搜尋激增
本港近日天氣明顯轉冷，嚟緊星期日仲會跌至攝氏10度或以下，人人都出盡「法寶」準備過冬。「本地薑」電器舖友和集團(02347)就醒啦，因應天氣轉變，預早採購存貨，仲制訂咗特別嘅市場推廣策略。
天冷當然唔少得暖爐、暖風機啦，據友和網上購物平台數據，喺11月23日至12月2日期間，電暖風機或暖爐搜尋量激增，銷量更係前一周嘅3.5倍。至於打邊爐最緊要嘅「爐」，無論係電火鍋爐定電磁爐，搜尋量及銷量亦受惠氣溫下跌而上升，銷量更按周增加超過兩倍！
暖風機暖爐最受歡迎
香港天文台預測寒冷天氣將持續至本周，友和話，雖然旗下禦寒產品種類豐富，包括電暖手蛋、發熱背心、電暖墊、浴室寶等，但傳統嘅電暖風機或暖爐仍然係最受歡迎產品，單一型號暖風機今年首次打入期內10大電器銷售榜，同時估計禦寒產品、火鍋相關電器短期銷售會持續上升添。
不過，計絲絲話，最醒莫過於及早預備過冬嘅大家，出街記得着夠衫，唔好冷親，身體健康至重要！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
