絲絲講場：比亞迪高層信股神愛不完

巴菲特早喺2008年9月就開始投資比亞迪，持股超過14年，喺今年8月披露首次外界已知嘅比亞迪H股減持行動，不足半年內已減持逾五分之一持股，持倉由最初嘅20.04%降至15.99%，仲引發市場對於巴菲特長期投資決心嘅質疑。

不過，李柯就信心爆燈，話「唔覺得減持表明巴菲特放棄咗比亞迪」，而巴菲特愛比亞迪，亦愛公司管理層，佢將繼續大力支持比亞迪！可能係絲絲嘅眼光比較世俗，無法參透佢哋當中嘅愛。若真的如李氏所言，睇嚟以後「打者愛也」都要改為「沽者愛也」喇！戴定頭盔，股神無就有關言論回應。

股神另一單矚目嘅「出貨」案例，就係中石油(00857)。2003年透過旗下投資旗艦巴郡，用唔夠5億美元買入中石油約23億股份，持有至2007年7月中開始減持，到10月已經沽清，用兩至3個月時間就清倉，獲利近280億元。由於當年巴郡係以平郵方式申報減持中石油，時差因素令其有足夠時間喺高位減持。不過，此後申報相關港股披露已強制電子化，大戶想靜雞雞清倉畀市場一個震撼彈，就冇咁容易喇！