絲絲講場：奈雪的茶改名去日化？

難怪唔少內地企業，都趁國潮崛起，自行認祖歸宗，圖分享背靠國家、扎根內地市場嘅優勢。近日就有「眼利」嘅內地網民留意到，奈雪的茶(02150)旗下有新店招牌名，轉咗英文串法，改用普通話拼音，相信有助增加內地用家嘅親切感，亦彰顯出係一個中國知名品牌！

睇番奈雪喺聯交所最新公告，大大個公司英文名稱都仲用緊日文讀音「NAYUKI」，而引起內地網民關注嘅新店就變成普通話拼音「NAIXUE」，字體亦變為線條更為平直嘅版本，連原本門市中文名「奈雪の茶」亦變成「奈雪的茶」。

雖然奈雪官方暫未有正式回應，但就引嚟奈雪官方客戶服務「解畫」，喺網民貼文下留言，表示品牌目前逐步進行VI（Visual Identity，視覺識別）升級迭代。據內媒了解，呢個係品牌７周年升級動作，仲話公司下月起進行全面升級，言下之意，內地店舖門面VI將迎來新面貌，兼順應「去日（日本）化」的趨勢。