絲絲講場：美基金推ETF同「燈神」對賭

主持美國財經節目，仲創辦過一個對沖基金的Jim Cramer（阿詹），就係美國一盞「明燈」。佢聲稱喺15年間平均每年淨回報率有24%，「閒閒哋每年拎1,000萬美元返屋企」咁話。不過，以上嘅成績都係阿詹自己講㗎咋，冇憑冇據，所以一直存在爭議。

佢喺2000年1月科網泡沫巔峰時，仲叫人投資科技股，而佢聲稱有買嗰10隻股票，喺科網泡沫爆破時跌到渣都冇，但阿詹居然話自己當年回報率高達36%。佢嘅「戰績」仲有2007至2008年間推薦雷曼兄弟。另外，統計2006至2007年，跟佢買股票就會賺12%，不過同期道瓊斯指數上漲22%。

唔少美國人都覺得買阿詹對家都係一個幾好嘅「懶人基金」，卒之，根據上星期三嘅美國證交會文件，Tuttle Capital Management申請推出兩隻交易所買賣基金（ETF），追蹤阿詹推薦同網民推薦股，其中一隻專門同阿詹對着幹，見佢做多，該ETF就會沽空。

其實，呢間資產管理公司亦都出過反向ARK ETF，專門沽空「科技女股神」伍德（Cathie Wood）嘅旗艦基金，今年就已經有56%收益率。而網民下一個願望就係「政壇女股神」佩洛西嘅正向ETF，仲話「姨姨，我不想努力了」喎！