昔日東方絲絲講場：騰訊前員工呻監管令創意窒息
內地舊年8月底為咗「培養民族復興的時代新人」嚴厲限制未成年人打機，被視為「企鵝仔」騰訊控股(00700)「印鈔機」嘅遊戲業務再陷停滯，間接拖累收入增長早過疫情「清零」。一名前騰訊遊戲設計師就向英國傳媒大呻，政府對遊戲內容嘅監管扼殺創意，搞到佢愈撈愈冇癮！
曾經喺騰訊開發遊戲嘅Ryan（大概係化名）覺得，舊東家勝在已經獲批嘅遊戲夠佢撐好耐，海外市場發展亦都值得關注，所以遊戲以後都會係騰訊嘅核心業務，就算佢嘅收入貢獻細咗，亦唔代表騰訊總收入會下跌云云。不過，絲絲翻查資料，其實上季騰訊收入已經按年倒退咗3%，為上市18年來第一次，可想而知實際情況可能比佢預期要差。
遊戲愈趨健康 無咁好玩
講講吓佢仲話，內地監管遊戲去到唔准遊戲角色流紅色嘅血（避免血腥），「係呀，啲遊戲愈嚟愈健康、愈嚟愈唔上癮，但無咁好玩囉」，感覺到自己愈嚟愈冇靈感，創意「窒息」，「同部機器差唔多」，聽得出真係好唏噓。
小妹就主張做人要向前望。嗱！新一批攞到版號嘅73隻國產遊戲，31隻屬「休閒益智」，與其懷才不遇呻到樹葉都落埋，不如認真取吓經啦！外界亦認為，以騰訊嘅遊戲儲備同開發能力，應該可以維持遊戲開發界嘅霸主地位，況且市場咁大，增長總會有，只係唔會好似以前咁瘋狂啫！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
