絲絲講場：花旗挽人才 度假勝地設中心

話說花旗喺嗰度為27名大多數細過25歲嘅後生BCMA（銀行、資本市場及諮詢）分析員開咗個辦公室，每日只係返工8粒鐘，放假就放假，完全唔使做嘢，同倫敦或者紐約嗰邊一星期做足7日南轅北轍。咁當然，揀得嗰度就預咗人工會比主要辦公室嘅同事低一截。

對於行家質疑咁做會浪費後生仔嘅光陰，花旗投資銀行全球主管法爾科斬釘截鐵否認，強調呢單嘢唔係純粹搞噱頭，事關呢家投行成日畀新人炒老細魷魚，搶人又輸畀私募基金同科企，因應一批叻嘅人可能更加追求工作同生活平衡，就試吓新招吸引更多初出茅廬嘅「最強大腦」，遏止人才流失。

其實呢份「筍工」只係為期兩年，如果想過啲主流投行生活，就要申請去番紐約或倫敦等地。

花旗BCMA職員部阿姐德爾里奧話，以前業界遇着個市唔好就請少好多畢業生，結果個市好番就唔夠人用，一啲大行更加榨乾啲分析員，所以公司要證明畀人睇限工時一樣做得掂，「或者有時做M&A（併購）交易工時會長啲，之後補番多啲假，等佢哋叉足電，多啲時間思考同創新。」