絲絲講場：星展闖元宇宙虛擬宣揚ESG

雖然元宇宙概念好似好虛幻，但有唔少傳統機構涉足其中。最新就有星展集團宣布，喺元宇宙度買咗塊虛擬土地，唔通要將分行開到元宇宙？原來星展同Animoca Brands旗下嘅領先去中心化虛擬遊戲世界平台The Sandbox，合作建立「DBS BetterWorld」，致力創造互動元宇宙體驗，成為首家闖入元宇宙嘅新加坡銀行。

The Sandbox靚地索價159萬

星展話，將會購入一塊3x3嘅虛擬土地（LAND），即The Sandbox元宇宙中嘅一個虛擬房地產單位，並結合沉浸式元素進行開發。The Sandbox話，「LAND」大小係96米乘96米，可開發空間128米高，每幅「LAND」可創作一款遊戲。咁絲絲即刻睇吓點賣法，原來喺虛擬資產交易平台OpenSea上面，一幅3x3嘅虛擬土地，地段靚嘅要價120枚以太幣，即係約20.48萬美金（約159.74萬港紙）。如果喺地圖邊緣嗰啲不毛之地，咁就10枚以太幣都有交易，即係13.31萬港紙啦。

至於塊地用嚟做乜？星展執行總裁高博德表示，項目可作為創新平台，以宣傳ESG（環境、社會及管治）議題。The Sandbox營運總監和聯合創始人Sebastien Borget就話，期待同星展喺虛擬地圖上創建「新加坡宇宙」，將新加坡文化帶入元宇宙嘅日常生活中。

唔止係星展，滙豐同摩根大通都喺元宇宙度插咗旗，仲有Adidas、Gucci等嘅牌子。唔好執輸，等絲絲研究吓仲有咩好地段先！

余絲韻

「東網Money18」fb專頁：有討論、有分析，齊來FUN享，贏盡●你Like

Money18更多即時港股指數資訊