絲絲講場：李寧月租200萬闖尖沙咀名店街

香港被疫情蹂躪超過兩年，零售業重創。正當唔少品牌捱唔住選擇止蝕離場之際，據報國產體育品牌李寧(02331)竟逆市發圍，計劃進駐尖沙咀廣東道「名店街」，將開設第一家旗艦店。近日舖外已貼出李寧嘅品牌Logo，有指會喺第四季開業。

市傳呢間位於尖沙咀旅遊區、面積逾7,000方呎嘅旗艦店，月租盛惠200萬港紙，成為呢期香港核心區最大單一舖租交易。不過，同舖位上手租客周生生(00116)最高月租700萬港紙相比，就平咗七成。

其實李寧喺2009年進軍過香港，喺尖沙咀都開過一間「李寧牌羽毛球專賣店」，無奈當時競爭力比唔上其他海外品牌，加上公司內地業務發展受阻，國際化策略都要暫停一陣，之後喺2012年回歸。

受惠「國潮」內地市佔勁升

經過幾年大刀闊斧改革，李寧近年成功轉型，加上「新疆棉」風波引發「國潮」效應，國產品牌喺內地市場急起直追，形勢完全唔同晒。當然公司仲未放棄海外發展，李寧家族控制嘅非凡中國(08032)過去兩年先後將香港服飾品牌堡獅龍(00592)同英國鞋履品牌Clarks等收歸囊中。

唔知今次李寧香港新舖開張後，香港消費者反應如何？李寧股價尋日表現反覆，早段曾升1.93%，高見68.65元；全日微跌0.37%，收報67.1元。

余絲韻

爆料熱線：

(852) 3600 3600

傳真：

(852) 3600 8800

SMS：

(852) 6500 6500

電郵：

網上爆料：

MMS：