絲絲講場：內地債券發行無肉食 滙控也瘦身

外媒引述消息指，負責大中華區債務資本市場嘅香港團隊將縮減至一名董事總經理和5名董事，而負責中國債券市場嘅兩名副總裁就準備派散水餅了。銷售中國高收益債券原本就有利可圖嘅，不過，自從內地房地產企業債爆煲之後，支歌仔就冇得唱嘞！今年以來，中國離岸債券發行量下滑45%，得番640億美元。因內地債券市場生意不景而排名節節下跌的滙控，由第5位跌至13位。

至於內地證券業都面臨緊減薪潮，據48家內地上市券商上半年業績，人力總成本為795.9億元（人民幣‧下同），按年減少咗11.2%，有73%證券公司人力成本收縮。以人均薪酬嚟計係27.2萬元，按年下滑19.7%，相當於月薪4.5萬元，同銀行人均月薪3萬元相比，證券公司減完薪都仲係高人一等。

上半年計，中信証券以43.4萬元的人均薪酬排名第一，月薪7.2萬元，比舊年同期90.9萬元大幅減少52.3%。排名第3嘅中金公司，人均年薪38萬元，下滑25.8%，相當於每月收少2.2萬元。

又唔怪得證券公司嘅，48家上市證券公司中，有37家收入按年減少，仲有6家券商出現虧損，咁惟有睇餸食飯啦。