絲絲講場：港銀行界女強人當道

香港上海滙豐銀行委任龍宇（Annabelle）為獨立非執行董事。龍宇個中文名雖然man，但係一位優雅嘅女士嚟，擁有逾15年投資經驗，現任BAI資本的創始及管理合夥人，以及貝塔斯曼集團管理委員會成員。主席王冬勝表示，龍宇對於中國風險投資市場有深厚認識，相信能為董事會帶來寶貴貢獻。睇番成個香港滙豐董事會14人當中，華人面孔有8位，而女性就有4位。

滙豐控股(00005)嘅大股東中國平安(02318)咪話想分拆嘅，雖然兩間金融公司因為業務上有衝突，所以平保未必可以派人「入局」，但原來滙控董事會當中，都有兩位華人坐鎮，分別係星展集團（DBS）前副主席兼行政總裁（CEO）戴國良，同埋通用電氣（GE）前高級副總裁段小纓。

同日，花旗集團宣布委任辛葆璉（Aveline）為香港及澳門區CEO，接替4月獲委任為環球財富亞洲區主管嘅伍燕儀。擁有25年銀行業工作經驗嘅佢，將負責集團香港及澳門業務，包括促進與主要客戶及監管機構的關係，佢亦係花旗銀行香港分行CEO。

屈指一算，計埋滙豐香港林慧虹、恒生銀行(00011)施穎茵及渣打禤惠儀，香港有4間大銀行嘅港區「大班椅」都係由女性穩坐在上，都咪話唔威！