絲絲講場：英物價高漲 棄養寵物增

外媒引述動物團體Dogs Trust所講，今年以來接獲1.5萬次來電查詢點樣棄養寵物，同去年首7個月相比大增超過五成，為該機構喺2014年開業以來最高水平。該機構指出，飼主因財務狀況而被迫做出選擇，並指經濟危機將導致人們無力照顧寵物，因而需要棄養。

根據獸醫慈善機構PDSA資料，養狗每月平均成本介乎50至80英鎊。另有調查顯示，78%嘅寵物主人認為，生活成本危機會影響佢哋嘅寵物，另約68%受訪者擔心護理費用增加，19%擔心點樣負擔養寵物嘅費用。

其實，棄養寵物呢個情況唔止喺英國出現。香港喺疫情同移民潮夾擊之下，據講今年上半年嘅寵物棄養個案比例亦較疫前急升一倍。作為一名飼主，絲絲覺得養寵物前應該諗清楚，養得就盡量當成家中一分子。所謂「貴有貴養，窮有窮養」，窮就一齊慳啲食，能夠齊上齊落就最好，未到山窮水盡，都唔好輕易言棄！