昔日東方絲絲講場：西班牙首相話唔打呔可慳電捱轟
自從有咗「ESG（環境、社會和管治）」呢個概念之後，金融界就突然肩負起拯救地球嘅責任，尤其是銀行，批貸款畀企業之前都要睇吓個項目夠唔夠環保。今年歐洲夏天熱到反常，更加令到各國政府同企業意識到ESG幾咁重要，要做嘢嘅唔止係銀行同林超英。
紡織業：疫下踩多腳
尋日西班牙最高氣溫達到39度，可以話係歐洲「大火爐」，不過，當地首相桑切斯（Pedro Sanchez）就實行「火上加油」，近日呼籲民眾返工唔好打呔，冇咁熱，開少啲冷氣咪可以節約能源囉，呢番說話引發紡織業界反彈，更被民眾強烈恥笑。
西班牙紡織、零配件及皮件貿易協會（Acotex）會長批評，桑切斯嘅建議會對飽受疫情打擊嘅紡織業再踩多一腳。而清醒嘅西班牙民眾就覺得，唔打呔到底有幾降溫呢？而且總理勸人唔好打呔嘅時候仲着緊西裝外套，除件衫點都涼過打少條呔啩？
自從俄羅斯入侵烏克蘭後歐盟面臨天然氣危機，加上今年夏天特別熱，西班牙鼓勵遠程工作，並在夏季限制辦公室冷氣和冬季限制暖氣。而上個月，西班牙通過一項價值超過90億歐元嘅補助計劃，包括減電費，同埋為低收入人士一次過支付200歐元。吓？咁咪變相鼓勵用電？
西班牙負責監督能源政策嘅政府部門仲奇妙，佢哋話冷氣開到27度可以降低用電量喎。睇番我哋香港風扇界代表、天文台前台長林超英，10年冇開過冷氣嘅佢就解釋，「開冷氣用好多電，釋放二氧化碳，將來只會更熱」！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
