昔日東方絲絲講場：廣汽董事長呻同寧德打工
廣汽集團(02238)新能源汽車發展認真唔錯，今年頭6個月銷量按年增長近80%，佔新車比率升到接近10%。中國乘用車市場信息聯席會就估計，今個月全國新能源車銷量按年再升1.02倍。
不過，廣汽董事長曾慶洪近日喺四川舉辦嘅世界動力電池大會大吐苦水，話依家電池成本佔成架車四成，甚至更多，而且有升無跌。佢反問：「我現在不是給（車用電池巨頭）寧德時代打工嗎？」（其實曾總識講廣東話）
電池貴 曾總想買鋰礦
佢仲話廣汽已經諗緊買個鋰礦，保障電池供應鏈已經係國家戰略，建議國家加強監督，幫電池原料價格返到合理區間。
不過，計絲絲話，寧德時代咪又係同鋰礦打工！掌舵深圳股王嘅寧德時代董事長曾毓群覺得，電池原料漲價有一定炒作成分，其實鋰資源並非產業發展嘅樽頸位，已探明儲量足夠全球車用同儲能電池所需，況且電池絕大部分材料可以循環再用，寧德唔少鋰係由回收得嚟，而企業亦可以用陶瓷土等新途徑提煉鋰金屬。
講返轉頭，呢個大會喺四川搞有特別意義，因為當地有好多鋰資源。不過，大和分析師葉捷賢（Dennis）就提醒，短期內鋰價真係難跌，開採四川鋰輝石嘅技術難度唔低，至於喺江西用陶瓷土採煉鋰係諗得過，前提係鋰價要夠高。
佢嘅同事劉偉健（Kelvin）就將深圳股王目標價調高11%到780蚊人仔，即係比尋日收市價有46%上升空間，理由包括鋰自給率有望喺2025年之前由依家個位數升到61%，成熟嘅產品組合亦會令到佢嘅海外市佔率繼續擴大。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
