昔日東方絲絲講場：渾水創始人被偷橋 壓力大到即爆瘡
沽空機構渾水（Muddy Waters）創始人Carson Block過去狙擊多隻中資股，講得一口流利普通話嘅佢以「打殘」嘉漢林業同輝山乳業令人聞風喪膽，但威風背後，原來佢已經開始懷疑人生，更自爆試過壓力大到痔瘡發作、演講要全程着住成人尿片！
市場搶先沽空好未來
佢話，幾年前準備去紐約演講披露自己狙擊教育股好未來，就好似2017年佢嚟香港出席投資論壇嗰陣宣布狙擊敏華控股(01999)咁樣，向市場投擲一大個震撼彈。殊不知，佢喺坐飛機途中發現，有人已嗱住佢嘅演講內容率先沽空好未來，空倉嘭嘭聲上，搞到佢嘅血壓霎時間跟住一齊飆。
為免平倉嘅時候人踩人，即係股價大幅反彈被大挾淡倉，佢急Call班手下平晒好未來啲淡倉，可惜已經慢咗，好未來股價已經彈緊，嗰一刻佢周身唔舒服兼作嘔，過多陣更發現下身粒痔瘡早過好未來嘅淡倉爆咗，搞到佢一落機就衝去買件Tee冚住啲血漬，順便買包成人尿片，着住佢發表題目由好未來改為中國會計問題嘅演講，認真狼狽。
監管機構審查更頭痕
畀人「偷橋」事小，更煎熬嘅係監管機構查佢。事緣美國證交會（SEC）同檢察官一直查緊沽空機構係咪不當咁夾手夾腳攻擊上市公司。SEC依家如佢所願咁向中概股開刀，但佢覺得自己從來無犯法，咁樣「畀人揸住支槍指住真係好難頂」，間唔中懷疑冒咁大風險狙擊上市公司係咪值得。
諗番起舊年年頭香櫞研究喺GameStop一役畀散戶挾爆，黯然宣布收山唔再唱淡股票，莫非沽空機構真係會逐漸淡出江湖？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
