絲絲講場：米奇老鼠將被全民惡搞？

米奇老鼠喺1928年10月頭誕生，據美國版權法，迪士尼擁有初代米奇老鼠嘅獨家版權95年，亦即係2024年就會失去佢嘅獨家版權。美媒就話，迪士尼正游說國會議員，希望延長版權到期期限，但情況就唔多睇好。

當地律師Daniel Mayeda就話，雖然版權到期啫，但商標冇到期吖嘛。佢話喎，迪士尼基本上可以永久擁有商標，商標上嘅角色名，迪士尼都可以一路用落去。而民眾到2024年確實可用初版米奇老鼠嚟創作自己嘅故事，不過，如果作品令人聯想到迪士尼，就可能侵犯商標，產生法律後果。

其實過期嘅卡通角色係前車可鑑嘅，小熊維尼（Winnie the Pooh）原版連埋故事入面大部分角色，即係豬仔、跳跳虎咁，迪士尼嘅獨家版權今年1月已經到期，一到期即刻被大量「惡搞」。飾演「死侍」嘅荷里活演員Ryan Reynolds當月就即刻用嚟創作自家品牌廣告，仲幫佢改名做Winnie-the-Screwed（衰咗的維尼）。

講到呢度，絲絲即刻同美術部傾一傾先，下次港聞影到後巷一大堆老鼠開餐嘅話，可唔可以用初代米奇老鼠嚟打馬賽克，起碼形象正面啲。