絲絲講場：新世界試行4天半工作周

事緣包括新世界發展(00017)、新創建(00659)在內嘅新世界集團話，為咗協助員工實現更良好嘅工作與生活平衡，促進身心健康，宣布優化家庭友善措施，包括試行「夏日工作天」（Summer Fridays），喺7至9月嘅夏季實施4.5天工作周及一天WFH（在家工作），採用混合辦公模式，畀員工更彈性安排工作時間同地點。

事實上，國際人力資源顧問Randstad曾發表報告指，超過六成本地受訪者認為最重要嘅價值係「工作與生活平衡」。報告亦指出，高達六成半受訪女性喺求職時會視「工作與生活平衡」為首要因素。放眼海外，好多地方都陸續實行減少工作天數，例如今年6月英國約70間企業試行4天工作周，連出晒名工時長嘅日本，巨企松下集團同UNIQLO都縮減員工工作天數。

新世界今次就話，期望透過有關安排，提升員工福祉，從而令員工工作時更有動力同效率，達致共贏。為咗確保員工WFH都維持高效率，集團會同員工保持密切溝通及盡量提供所需技術同埋相關支援。若然呢個計劃證實企業同打工仔都受惠，可以長期執行，新世界做咗個好榜樣，其他大企業倣效，共建和諧社會，咁都算係大功德！