昔日東方絲絲講場：阿南德預告亞洲大難臨頭
全球經濟喺上半年突然急轉彎，喺高通脹、環球央行收水及俄烏戰事夾擊下，整個資本市場都令投資者損失慘重，只好寄望下半年可以時來運轉。不過事與願違，向來以神準聞名嘅印度神童阿南德（Abhigya Anand），喺最新預言中帶來壞消息，提醒身在東亞嘅民眾將有大難降臨；更呼籲全球提防新冠肺炎疫情大反撲，動搖世界經濟。
估英法再爆疫 衝擊經濟
對於阿南德嘅星相專用名詞，絲絲一頭霧水，而大意卻相當清晰。佢講到6月21日夏至係陽衰陰盛嘅轉換點，而喺7月7日至8月7日屬於「天克地衝」，係最凶負能量之一，期間尤其需要注意。
佢又話，今年東亞地區正值多事之秋，屬戰亂紛爭嘅凶星東移，內地、台灣、日本及南韓都要格外小心，好大機會有災難發生。
除咗警示東亞，阿南德對全球疫情大流行亦提出警告，話西方國家依仗高疫苗覆蓋率，全面放鬆防疫唔戴口罩，更點名英國、葡萄牙、法國等國，可能喺下半年再陷疫情泥沼，呼籲投資者應見好就收，唔好投機，否則可能得不償失。
如果上述預言最終應驗，勢必衝擊環球經濟，加快全球衰退進程，進而影響全球地緣政治格局再惡化。
不過，絲絲都係戴番個頭盔，事緣阿南德早前被印度媒體爆大鑊，話神童形象係由父母出錢「課金」塑造。事後阿南德出面澄清，強調家人從未出過「一毫子」畀媒體做宣傳。講咗咁多，最終都係信不信由你！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
