昔日東方絲絲講場：心動創始人計劃移居 股價插
內地遊戲商心動公司(02400)創始人、董事會主席及首席執行官黃一孟喺公司內部網站「工作日誌」透露，準備明年暑假後移居外國，並無透露移民目的地，不過就話移居海外係家庭原因，同埋海外有更多發展遊戲的機會。消息一出，心動嘅股價即刻「異動」，尋日就跌咗15.5%，收報21.25元，以接近全日最低位收市。
現年40歲嘅黃一孟喺公司內部備忘錄提到，「將會以事業和家庭並重，未來公司的海外業務將佔據更高比重」，並希望心動公司成為一家全球性公司。佢仲補多句，話「更理想是一年後中國疫情政策可以更加寬鬆，國際關係可以更加平和、開放，大家可以按工作和生活需要如常活動。」
「與公司前景無關」
理想歸理想，但面對現實都係要低頭，有外媒問番黃一孟有無回應時，佢表示會經常往返於中國和海外，但就唔打算接受外國國籍，並指佢嘅計劃同心動公司目前情況同未來前景無關。公司舊年制訂咗向海外擴張計劃，而佢嘅職位亦將不變。
至於佢如果真係走人會有咩影響？2021年12月，黃一孟以70億元人民幣財富位列《2021胡潤U40青年企業家榜》第8位；而同一年4月，喺福布斯全球富豪榜，黃一孟以12億美元財富位列榜單第2,378名。如果佢移民或者移居，你估份身家會唔會跟住佢本人走呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
