絲絲講場：豐田社長人工竟低過下屬

該企截至2022年3月為止嘅財務報告顯示，社長豐田章男嘅年度薪酬增加55%，達到6.85億日圓（約4,000萬港元），即係月薪333萬港元左右啦。以堂堂豐田汽車嚟計，聽落好似少咗啲喎，但係呢個金額已經創下豐田歷任社長最高人工。

上財年豐田汽車營業利潤按年增長36%至2.99萬億日圓，創新高；3月底總市值達36萬億日圓，按年增27%。至於人工點計，豐田對會長、副會長同社長都係用「問責制」，表現好與唔好，會令人工增或減50%，都幾刺激，不過就可以推動班高層再做好啲。豐田上財年薪酬超過一億日圓嘅董事有5個人，包括會長內山田竹志、副會長早川茂和總裁小林耕士等。

你以為社長人工一定係最高？咁就錯啦，有一位董事James Kuffner薪酬多過社長32%，高達9.06億日圓（約5,276萬港元），冠絕全個豐田。點解咁高？其中一個原因，可能因為佢係「舶來品」！

事緣豐田對外國員工，會參照番佢鄉下嘅水平出糧，來自美國嘅James就自然收貴啲。不過佢來頭都唔細㗎，係史丹福大學博士，專長研究機械人，2016年加入豐田嘅人工智能研究實驗室，2020年進身豐田董事會，現為首席數碼官，係豐田自動駕駛業務嘅操盤手，難怪身價咁高！