昔日東方絲絲講場：巴基斯坦籲民眾少飲茶救經濟
過去有南韓民眾向政府捐金救國（嗱，真人真事㗎，發生喺1997年金融危機時），今時今日就有巴基斯坦政府呼籲民眾飲少啲茶，慳番進口開支，拯救國家經濟。飲多杯茶都唔得，好大壓力喎，朋友！
去年茶葉進口額逾46億
原來巴基斯坦人鍾意飲茶，鍾意嘅程度係自己國內生產嘅茶葉都唔夠飲，所以巴國係全球最大茶葉進口國。舊年全年該國茶葉進口金額就高達6億美元（約46.8億港元），推算巴基斯坦人均每日飲3杯茶，而該國人口就有2.2億人，要消耗幾多茶葉先夠？
巴基斯坦聯邦規劃和發展部長伊克巴爾（Ahsan Iqbal）呼籲民眾「每日飲少一至兩杯茶」，以應對巴國經濟問題。一年進口近47億港紙，就算慳番一成，都4.7億啦，少數唔怕長計吖嘛！不過，一班作為茶癡嘅巴基斯坦民眾就唔多接受，仲呼籲佢辭職。如果真係因為飲茶問題，搞到連份工都冇埋，又確係陰功。
講番巴基斯坦嘅經濟狀況先，4月份貿易逆差有265.16億港元，即係進口遠遠多過出口價值。2021年GDP按年增長3.94%，聽落好似唔錯？唔好意思喎，今年5月巴基斯坦通脹率按年升至13.8%，創逾兩年新高，即係乜嘢經濟成果都畀通脹蠶食晒啦！
同一時間，巴基斯坦外匯儲備到今個月第一周降至唔夠100億美元，再過兩個月就乾塘。上個月政府已限制進口幾十種非必要奢侈品，以確保資金唔好外流得咁快。呢個問題咁嚴重，不如我哋飲啖茶，食個包再諗計？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
