昔日東方絲絲講場：會計師「扇」風點火燒壞腦
近排天氣又濕又熱，作為一個專業嘅核數師，隨身帶住部電風扇仔都好正常啫！不過，早兩日有會計師去到個客嘅辦公室核數時，疑似因為留低電風扇仔叉電叉過夜而發生小型爆炸，正宗係「扇風點火」。根據網上流傳嘅片，間辦公室嘅手提電腦都熏黑晒，恐怕存檔都危危乎！
涉事嘅「芭蕉扇」睇落只係受咗輕傷，反而波及旁邊嘅手提電腦，屏幕似乎已經被「二級燒傷」，兩位「傷者」都唔需要急救，初步驗傷之後應該可以直接送入垃圾桶。
審計底稿無損全靠科技
肇事會計師樓就係立信德豪（BDO），該公司指事件純屬意外，冇人受傷，雖然有電腦被燒毀，不過好彩就冇損害客戶資料，主要係科技救番一命，因為審計底稿都會上傳雲端。
講到事發原因，竟然係因為OT（加班），個客嘅辦公室為響應ESG（環境、社會及管治），過咗辦公室時間會熄中央冷氣，以致員工全晚都用電風扇仔，咪釀成意外囉。據了解，客戶為一家上市公司，事發後表示諒解。
另一大亮點就係，用緊嘅手提電腦係聯想（Lenovo）Thinkpad，即係鍵盤正中有一點紅嗰款！肇事嘅「芭蕉扇」係咩牌子呢？絲絲都想知呀！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
