絲絲講場：內地靚女分析師唱好A股仍「被辭職」?

話說呢位靚女分析師早兩日喺社交平台話：「（上海）股市要漲到4,000點。」尋日滬綜指收報3,238點。喂，佢唱好㗎喎，應該冇事先係㗎！

事件去到呢度，又令絲絲遙想疑似「因預測滬綜指跌穿3,000點而離職的」前任交銀國際董事總經理兼首席策略師洪灝。不過，「同人唔同命」，靚女分析師引起嘅關注好似多啲喎，尤其係內地傳媒連佢嘅黑歷史都起埋底！

內地傳媒挖到譚珺係做電商出身，依家係屬於方正電子行業團隊，而中國證券業協會網站顯示，佢喺2017年底入行，本科學歷（即係學士畢業），僅具一般業務資格，入職方正都唔夠7個月。

根據中證協規定，證券分析師應當通過公司規定嘅系統平台發布證券研究報告，不得通過短訊、個人郵件等方式向特定客戶、公司內部提供或洩露尚未發布的證券研究報告內容和觀點，不得通過包括論壇、博客、微信、微博等互聯網平台對外提供或洩露尚未發布的證券研究報告內容和觀點。

絲絲估計靚女就係觸犯上述呢條例，之後就傳出對話截圖，稱自己「被辭職」。方正證券方面就指，已啟動合規調查及問責，仲未出正式結果。