絲絲講場：馬斯克大膽預言「內地人口將崩潰」

根據台灣一個官方統計，截至2020年中，65歲以上高齡人士仍然參與勞動力嘅比例，最高三甲依次係南韓、新加坡同日本，分別達35.3%、30.1%、25.5%，香港呢？其實只得12.1%算係好幸福，美國都成19.4%。老人遲退休，主要都係因為出生率低所引致。

好似南韓咁，舊年已有調查，七成老人希望工作到73歲，原因係「希望賺取生活費」。部分原因係當地家庭債務高。國際金融協會（IIF）公布，截至今年第一季，南韓家庭負債與GDP比率達104.3%，喺36個被調查嘅經濟體中居首，亦係唯一一個高過100%嘅。第二位係黎巴嫩（97.8%），香港亦達95.3%，排第3。

日本嘅比例為59.7%，雖然家庭負債較GDP相對低，但出生率就縮得好快。日本厚生勞動省早前公布，2021年每名女性一生中生小朋友嘅平均數為1.3，已連續6年下降，出生人數亦創歷史新低。同期歐美國家正在上升，美國同法國分別上升0.02同0.01，達到1.66同1.83。

內地又點呀？去年只得1,062萬個BB出世，每千人出生率為7.2，創1978年以嚟最少。一向意見多多嘅美國富豪馬斯克（Elon Musk）就喺Twitter發文，話內地好多人仲以為只可生一胎，唔知已實行3胎政策，又話根據呢個趨勢，內地每個世代人口將減少40%，人口會崩潰咁話喎。究竟會唔會畀佢開口中呢，就等時間驗證啦！