絲絲講場：騰訊馬化騰轉發文章 一鳴驚人

話說官媒前總編輯胡錫進近日多次在其個人社交平台評論中國經濟，日前有篇網絡文章《除了胡錫進，沒人關心經濟》在內地網絡瘋傳，更有網傳截圖指馬化騰在社交平台好友圈轉發上述網絡文章，點評指出「這段描述得太形象了」，隨即一鳴驚人！

馬化騰因咩解究對「這段描述」嘅內容咁感同身受，絲絲當然想參詳一下，原來係「部分網民關心經濟的方式是：企業可以破產，但不可以裁員；企業可以破產，但不可以加班。至於什（甚）麼叫中國經濟？他們不懂，也不關心，他們唯一關心的中國經濟就是芯片（晶片）和所謂的硬核科技，至於衣食住行，都太俗不可耐了，不重要。」最後仲講笑提到，如果網民們叫外賣送遲咗10分鐘，他們罵起外賣小哥又比誰都狠。

答案，已經呼之欲出啦，如果大家有留意過往逾年內地晶片以外嘅科企監管風暴、近日嘅科企裁員消息，以至騰訊上周剛出爐嘅首季業績點樣「大走樣」，就可能體會到呢位民企富豪今次一改昔日沉默作風嘅心路歷程。

不過，內地網絡「大V」（網絡紅人）胡錫進對於各界咁抬舉佢，即刻戴番個頭盔，仲呼籲「別給我戴高帽」，發文回應首兩句就講明各地方政府「哪有不關心域內經濟的，很多專家更是以論述經濟為己長」，仲話經常有人借說其言論，抒發自己的主張及焦慮，但希望評論者尊重基本事實，直指上述網絡文章明顯是誇張之論，睇嚟呢位評論家唔單只要戴頭盔，仲要行埋騎樓底。