絲絲講場：譚仔破天荒聯手三哥大搞「勿演」NFT？

有關帖文附上一段充滿科幻感嘅20秒嘅短片，一眾粉絲估緊有乜新搞作，其中有人推測係兩個品牌嘅餐單合併，咁就可以喺三哥店食到譚仔獨家湯底，或者喺譚仔店食到三哥獨家小食，以後唔使再分三哥或譚仔喎。

甚至有人估會推出「即熱食材包」，不過絲絲可以肯定呢個答案唔啱，事關早幾日見到行政總裁劉達民，已追問過佢相關問題，好讓海外港人都可以食到譚仔，一解思鄉之情，當時佢答未有計劃住，遲吓會詳細考慮。

預告片開首只寫「REIMAGINE」，之後畀多少少貼士，「REIMAGINE A SOUPER JOURNEY」。絲絲八到，公司打算進軍「元宇宙」，發行「勿演NFT（非同質化代幣）」，合乎譚仔國際貼近潮流風格。至於新旅程詳細係點，就真要下星期先知啦！唔理咩搞作都好，條片已經吸晒Like，市場營銷部嘅同事應記一功。