絲絲講場：貝索斯轟拜登 擬搵巨企開刀抗通脹

貝索斯上周五喺社交平台Twitter怒批拜登嘅另一篇貼文，拜登講到：「想要降低通脹？不如搵最有錢嘅企業同我哋共同富裕啦」。貝索斯敦促美國國土安全部新成立嘅虛假訊息治理委員會審查呢條推文。當然啦，貝索斯旗下嘅亞馬遜市值有1.12萬億美元，點計都應該係「有錢嘅企業」啦﹗

雖然貝索斯認為，提高公司稅「有得傾」嘅，但就應該將抑制通脹擺喺更關鍵位置，兩者唔應該混為一談。白宮將公司稅與通脹上升扯上關係，被呢位惹火富豪炮轟。另一邊廂，佢嘅「對家」馬斯克被問到對貝索斯嘅言論有何睇法時，就話造成通脹係因為政府「印得太多銀紙」，認為呢個問題「其實唔難」解決。

馬斯克仲判斷美國經濟可能已陷入衰退，並且會維持一年或者年半，警告企業要留意成本和現金流。嗱，留意番，馬斯克一樣係世界首富，雖然近排特斯拉（Tesla）股價已經跌咗好多，但都係「有錢嘅企業」。如果美國開徵「富人稅」，佢一樣走唔甩！