絲絲講場：摩通嚇冧科網股 兩個月後話「用錯字」

事緣係，摩根大通喺3月14日發表一份研究報告指出，中國科網股普遍都係「不可投資（uninvestable）」，科網股隨即急挫，出報告嘅當日，恒生科技指數狂瀉逾11%，恒指更加連續兩日跌超過1,000點，而且暴瀉都同中資科網巨企遭洗倉有關，個報告都咪話唔準。不過，事隔兩個月，竟然傳出內部消息人士指報告喺字眼運用上出錯。

消息人士指出，摩通分析師姚橙（Alex Yao）被內部審核研報嘅編輯要求喺28份報告中刪除「不可投資」一詞。於是Alex團隊用咗「不具吸引力」取代「不可投資」，聽落係咪即刻順耳晒呢？不過百密「四」疏，竟然改漏咗4份報告，其中一份係話京東集團(09618)喺6至12個月內「不可投資」。

實情係，Alex團隊認為對待中資科網股要更加謹慎，仲預計其中至少10家公司股價到年底睇升，所以並唔係完全「不可投資」。消息人士稱，摩通嘅編輯、分析師同主管喺報告發布前都認為「不可投資」用詞唔係最恰當。

呢個「用錯字」嘅影響力可能已經反映咗，知情人士指，Alex團隊將小米(01810)創始人雷軍投資嘅美股金山雲目標價「腰斬」後，原本金山雲過嚟香港上市，摩通有份做主承銷商角色，報告一出之後，摩通變成只係擔任上市保薦人，排名仲落後於瑞銀及中金公司。

絲絲就咁睇，就算明星上網like錯貼文，都可以話自己畀黑客入侵啦，今次摩通係咪真係「用錯字」咁簡單就不得而知喇。