絲絲講場：股神舉辦最後慈善午餐

由2000年開始，除咗疫情爆發最勁嘅2020年同2021年外，巴菲特每年都舉辦慈善午餐，活動起標價為2.5萬美元，中標者可以帶最多7名親友，喺紐約Smith & Wollensky扒房同巴菲特共進午餐。至於今年佢就計劃舉行最後一場慈善午餐，為舊金山非牟利機構Glide籌款，預定6月12日至17日喺eBay開放競投。

何解今年係最後一次搞？唔通巴菲特真係收山？呢方面佢又冇解釋到。呢個慈善午餐活動舉行廿幾年嚟已為Glide籌得超過3,400萬美元善款，用嚟救助貧困同無家可歸嘅人。

睇番歷年約會成交價，幾乎年年都創新高，2019年就最終出價457萬美元（約3,564.6萬港元）。隨着中國崛起，近年好多巴菲特嘅「飯腳」都係華人，最出名包括創立步步高DVD、小霸王詞典同vivo手機嘅段永平，同埋區塊鏈系統TRON創始人孫宇晨。當中，段永平就話同巴菲特食飯係無價嘅，覺得幾多錢都不為過。

至於絲絲就比較關注呢間被「股神」選中嘅扒房，原來佢1977年就已開業，算係老牌美式牛扒餐館，更獲雜誌稱為「巴菲特扒房」。想試吓個牛扒？近近哋去台北就食到。

講開鋸扒就不得不提汽水。巴菲特愛股可口可樂近排密食當三番，無懼大市波動，幾乎日日都有升幅，周一仲創埋上市新高添，再次顯示股神眼光獨到！