昔日東方絲絲講場：車企搞元宇宙銷售 吸宅男
唔理你鍾唔鍾意，元宇宙（Metaverse）確實殺到埋身，依家連買架車都可以用到元宇宙。日本汽車大廠日產喺虛疑世界重現咗佢東京銀座個展銷廳，暫時係展示佢部最新電動車，今年內會喺呢個「場地」發布新車。
成件事係基於使用美國初創企業VRChat嘅服務，絲絲睇過一啲介紹影片，每個人都以虛擬實境（VR）嘅方式去到呢個展銷廳聽職員講解。最特別係每個人嘅虛擬世界分身，都係日本動漫嗰種Style，相信宅男同埋動漫迷一定好like。
日產豐田各自增虛擬空間
日產仲請咗啲客喺虛擬世界入面，陪住架新車去到世界唔同各地體驗。不過，絲絲就唔係太受落，因為除咗個展銷廳內部之外，其他場境都好粗糙，好似製作經費唔夠咁。
另一間日資大車廠豐田，據報喺2月時已喺土耳其開咗個VR會議。據講，公司已開始喺部分部門、子公司引入元宇宙。員工嘅虛擬分身可以喺虛擬辦公室內走動、開會、傾偈。喺豐田總部，技術開發和人事等部門已開始使用元宇宙，並且考慮會進一步擴大使用範圍。
豐田解釋，新冠肺炎疫情下，在家工作（WFH）機會增加，元宇宙將為年輕員工等人員提供一個空間進行內部交流。嘩，咁為新一代同事着想，真係唔話得。不過，虛擬返工，會唔會增加「扮工」機會呀？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
