絲絲講場：日本男女收入差天共地？

同樣係大學畢業嘅正式員工，日本男性一生嘅平均收入為2.69億日圓，女性就得2.16億日圓，大約相差5,250萬日圓（約321.9萬港元）。冇嘢嘅，差一個細住宅單位價錢之嘛。所以有日本家長就話，男女大學學費係一樣、學嘅嘢又一樣，點解出到社會做嘢，人工會差天共地？唔止係咁，調查仲發現，隨着年齡增長，男女年收入差距亦會擴大，即係日本女性嘅收入一世都唔會有追上男性嘅一日。你話係咪唔公平？

男女收入差距係發達國家共同面臨嘅課題，如果將男性嘅收入當係基數100，截至2020年，經濟合作與發展組織（OECD）成員國嘅女性收入平均得88.4，而日本就更低，只有77.5。

為咗消除收入差距，日本首相岸田文雄內閣提出將「女性經濟獨立」視為核心內容，佢仲喺今年三八婦女節之際發言，將修改企業公開數據規則，企業有義務要公開男女之間嘅人工差距。

依排成日講ESG（環境、社會和管治），查實公司「陰陽調和」都係一個重要因素。瑞銀財富管理指出，女性投資表現普遍好過男性，因為會經過深思熟慮先至投資。所以話，做事能力唔係睇性別嘅。聽講嚟緊「九運」（2024年起20年）有利女性掌權，日本女性會唔會順勢爭番口氣，且拭目以待。