絲絲講場：元宇宙都要供樓？ 按揭中介買地開舖

星之谷按揭宣布，於沙盒虛擬世界The Sandbox購入虛擬土地，建立「元宇宙按揭村」，讓客戶與按揭專員於虛擬諮詢中心會面，解答各項按揭疑難，並提供切合個人需要嘅按揭貸款方案。

星之谷購入嘅多幅虛擬土地，部分屬於大型文化中心Mega City範圍，按揭村將定期舉辦不同嘅樓市、按揭及海外樓盤展覽及講座，令客戶享受獨特嘅虛擬體驗，同時希望促進物業投資者及專業人士嘅交流。

星之谷按揭轉介行政總裁莊錦輝表示，全球大熱嘅「元宇宙」被認為係互聯網嘅未來，該企睇到通過新興平台創造嶄新體驗嘅潛力，尤其新冠肺炎疫情席捲全球，更多經濟活動轉往線上，虛擬世界蘊藏巨大商機。

「元宇宙」唔止有樓供，仲可以住酒店「宅度假（Staycation）」！荷蘭品牌酒店citizenM宣布喺The Sandbox購買土地並建造虛擬酒店，成為首個在The Sandbox購買土地嘅酒店集團，酒店計劃成為The Sandbox用戶嘅工作、瞓覺同娛樂場所。

話時話，「元宇宙」服務愈嚟愈多，唔使幾耐可能有埋「元宇宙」裝修公司、「元宇宙」開鎖佬同虛擬火險之類嘅生意出現添！