絲絲講場：日立推4天工作制搶人才

日本著名電器生產商日立製作所希望透過新工作制度，允許員工靈活選擇工作方式，吸引多元人才，從而提升生產效率。日立喺今個年度內以總部1.5萬名員工作為對象，每月嘅工作時間可靈活分配，取消每日3.75小時嘅工作時間「最低消費」，員工可自由選擇返工日期同時間。

以為好着數？其實日立又點會唔識計數吖。日立嘅新制度係保持總工作時間不變，只不過係用4日去做晒5日要做嘅工作，變相每日工時加長咗。

唔止係日立，連其他日本企業如松下控股和NEC亦都研究緊每星期休息3日嘅方案。只要有工作成果，就唔再拘泥於工作日數和時間，咁嘅經營方式先至係道理。

其他國家亦已經開始推廣休息3日制，大型企業聯合利華、西班牙電信等將會試行。而比利時政府2月公布，如果僱主同意，可以推行周休3日嘅勞動法改革方案，預計今年內實現寫入勞工法。英國雷丁大學（University of Reading）去年底向引進休息3日嘅約500名英國經營者做調查，結果顯示，68%認為有利於吸引優秀人才。