絲絲講場：PayPal創始人泰爾斥財圈耆英阻發達

現年55歲嘅PayPal聯合創始人泰爾（Peter Thiel）喺美國邁阿密舉行嘅比特幣2022年會上公開批評，「股神」巴菲特係阻止加密貨幣發展嘅「頭號敵人」，兼且鬧埋摩根大通行政總裁戴蒙，同埋貝萊德主席兼行政總裁芬克係「金融界耆英政治」。絲絲本身想反駁，但諗諗吓又似乎有啲道理。

巴菲特戴蒙芬克有份

泰爾稱呼巴菲特做「來自奧馬哈嘅反社會阿爺」，仲話佢係比特幣「頭號敵人」。巴菲特一向都睇淡比特幣同埋加密行業，佢曾表示：「我冇持有任何比特幣，而且永遠都唔會有。」當比特幣價格僅為100美元時，巴菲特曾經稱之為「老鼠藥」。比特幣價格漲至9,000美元時，有記者再問巴菲特有咩高見嘅時候，巴菲特仲話「可能係高純度嘅老鼠藥」。

泰爾認為，傳統投資者應該向比特幣捐款，因為當佢哋選擇不投資比特幣時，其實係一個深刻嘅政治選擇，「我哋需要反擊」。

呢位著名風險投資者仲將比特幣未能升至10萬美元，歸咎於巴菲特同戴蒙、芬克呢班「金融耆英」。

忽略虛擬幣代價沉重

鬧開有條路，佢又批評包括美國聯儲局主席鮑威爾在內等嘅央行揸弗人，話鮑威爾應該要多謝比特幣，因為咁係對佢嘅最後警告。如果選擇忽略虛擬貨幣發展，未來幾年一定會付出代價。

不過，泰爾似乎對比特幣太樂觀，認為市值將會超過黃金，最終可以同整個股票市場的價值抗衡，價格將係依家嘅100倍。至於口水戰邊個贏，一於鬥長命！

余絲韻

「東網Money18」fb專頁：有討論、有分析，齊來FUN享，贏盡●你Like

Money18更多即時港股指數資訊