絲絲講場：李小加創業 巨星級陣容捧場

事緣滴灌通近日公布，已完成7,000萬美元（約5.46億港元）的B輪融資，參與嘅投資者包括有份參與A輪融資嘅紅杉中國，另新加入嘅包括農銀國際、新世界發展(00017)行政總裁鄭志剛、盈信泰資本、莊士資本、Dara Holdings，以及富豪李嘉誠嘅私人投資旗艦維港投資、凱思博橋美基金（Keywise ARCHina Fund）、聯想創投、Vectr Fintech等機構。自2021年初成立以來，滴灌通累計融資總金額已達到1.2億美元，成績都唔錯！

其實，齋睇名未必估到呢間公司業務係咩，據悉其專注於連接中國小微企業和全球資本嘅創新金融平台，透過金融科技開創全新嘅融資模式和投資模式，為小微企業提供便捷且可負擔嘅長期資本，幫助佢哋成長，好明顯符合內地支持小微企業發展嘅國策，加上用創新方式經營，又有從事國際投行同中港兩地金融業達30年經驗、曾為港交所CEO嘅小加坐鎮，難怪吸引到城中富豪真金白銀投下信心一票！

老實講，小加喺港交所專做大企業，又揸唔少港交所股份，唔做退休歎世界都可以，依家創業專門服務小微企業，固然係一個新嘗試，但更多係出於參與中國經濟發展嘅一份熱誠，加上今輪融資搵埋國資企業參加，變相買定保險，不得不讚小加嘅商業智慧！