昔日東方絲絲講場：內地網企祝員工「畢業快樂」
畢業本應係開心事嚟，但喺內地嘅科網業原來又另一番意思！事緣多家科網巨頭自農曆新年前就開始醞釀裁員，近期有網企伙記收到「大信封」，一打開，原來係「畢業須知」嚟嘅……
京東B站傳裁員最甘
據講裁得最甘嘅包括京東集團(09618)、嗶哩嗶哩（09626，B站）。內地網上盛傳有京東員工收到「畢業須知」，劈頭第一句寫住：「畢業快樂！恭喜您從京東順利畢業！感謝一路相伴！」老實講，突然冇咗份工，仲要睇到封咁嘅信，都咪話唔把幾火！
而京東旗下嘅中國有贊(08083)就傳出幾張相，影到「畢業人士」嘅員工證裝滿一個紙皮箱。
最慘嘅係，以前被裁都可以另謀高就，但依家全個科網業都縮減人手，有「畢業人士」慨嘆，都好難搵到同行新工，甚至唔知幾時先搵得番一份工作。
講番京東裁員，主要涉及旗下零售、物流、健康業務和京喜事業群，整體裁員比例約10至15%，部分部門裁員比例高達30%。當中「社區團購」京喜事業群成為裁員重災區，估計最多影響600人。不過，對於主業零售分部就唔敢減人。
呢種美化裁員、「白事當紅事辦」嘅做法，官媒就唔買佢帳，直指與其處心積慮琢磨話術，不如做好善後，等員工利益得到最好嘅保護咁話。
余絲韻
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
