絲絲講場：烏克蘭IT人紛保家衞國

烏克蘭投資促進局統計顯示，當地IT企業有超過5,000家，去年電腦相關服務的出口總額達到68億美元，與2018年相比增至兩倍以上；而IT收益佔國內生產總值（GDP）4%以上。美國有分析估算，烏克蘭有8.5萬至10萬人從事以軟件和IT服務為中心的出口業務。

講到烏克蘭App，最「威水」莫過於英文文法檢測修正App「Grammarly」。該企目前估值130億美元（約1,014億港元），其開發團隊清一色係烏克蘭人。除咗總部喺舊金山以外，最大嘅辦事處位於烏克蘭首都基輔。開戰之初，Grammarly就決定向支持烏克蘭人民嘅組織和基金捐贈500萬美元，金額係由2014年俄國入侵克里米亞以來、來自俄羅斯嘅全部淨收入。

換臉App「Reface」雖然係娛樂類型，但一樣有骨氣，喺191名員工中，有27人選擇留喺基輔。其行政總裁強調，「既有參加領土保衞嘅人，也有人喺防空洞中通過訊息同技術支援烏克蘭嘅IT部隊，取決於員工的選擇。」打開App時，捐款予烏克蘭嘅連結長期置頂，已有15萬人認捐。

連外國企業也不遺餘力，語言學習App「Duolingo」行政總裁路易斯發現，自從俄國入侵烏克蘭開始，喺App上學習烏克蘭語嘅人數激增了4.85倍，該企決定將相關嘅所有廣告收入捐贈給烏克蘭。