絲絲講場：內企自辦敲鑼儀式冒用冧巴扮上市！？

話說呢一場「自編自導自演」嘅上市儀式，1月下旬喺福建廈門某酒店舉行，仲話會連線港交所直播，寫到明話「香港主板上市」。雖然「視奕科技」自稱股票編號（冧巴）係「01592」，但呢組冧巴係一間「基石控股」嘅股票編號。

當然啦，「視奕科技」冇經過港交所上市聆訊，亦都冇做過正規上市手續。事件被內媒發現之後，廈門市金融管理局發公告澄清，指「視奕科技即將於港交所正式敲鐘上市」的消息並不屬實，該公司目前未在港交所上市。嘩！咁又牙煙咗啲喎！

不過，日前「視奕科技」發聲明指自己都係受害者，曾經委託一間「粵商上市顧問（深圳）」，對港股目標上市公司要約收購，但就遭對方誤導。

根據視奕科技同粵商顧問簽訂協議，約定3月底前完成收購一家上市公司。而粵商顧問法定代表王利自稱實際掌控了香港上市公司基石控股58%股權。以絲絲嘅理解，應該就係傳統「借殼上市」啦！中間有一段時間，視奕科技都以為自己「成功上市」，甚至連官網資料都改埋係「香港上市公司」，可惜粵商顧問並冇兌現承諾。視奕科技指出，粵商顧問的行為造成極大損失，導致公司成為行業笑柄，已向警方報案云云。

其實，香港主板上市一啲都唔簡單㗎，要經過市值、盈利、現金流等等嚴格審核要求，至於過往成日講嘅「借殼上市」，由於早喺2018年香港監管機構全面打擊殼股，此後借殼一啲都唔易喇。若然自命係屬創新業務，倒不如研究吓新興嘅特殊目的收購公司（SPAC）上市可唔可行，但最緊要係搵合資格嘅專業機構去處理，免得再弄出天大笑話！