昔日東方絲絲講場：俄受制裁 銀行請人執手尾
俄羅斯受制裁並唔係咩新鮮事，早喺2014年入侵克里米亞後，西方國家已對俄羅斯實施制裁。據絲絲了解，雖然大多數銀行已經擁有合規專家團隊，專門去處理有關制裁嘅「手尾」，包括凍結相關人士及企業嘅戶口和其他錢銀往來，但今次俄國對烏克蘭發動戰爭，使制裁嘅條目急增，各家歐美銀行對於負責「執手尾」嘅合規部門人手需求亦相對增加。
據報，英國金融操守局（FCA）已經要求銀行提供俄羅斯受制裁嘅個人和企業，如何喺全球範圍內轉移資金嘅詳細報告。英國媒體稱，未能提供訊息嘅銀行，將被認定為未達到監管機構所要求嘅「公開透明」。
從現實角度來說，唔遵守制裁規例嘅銀行可能會招致巨額罰款。例如滙豐銀行舊年12月因洗錢而被罰款6,390萬英鎊，而渣打銀行喺2019年因違反制裁和洗錢，被罰款11億美元。
助追回犯罪資產 可獲獎金
其實早喺俄烏開戰之前，滙豐銀行就開始擴大歐洲制裁團隊。制裁專家比許多其他合規部門嘅人員賺得更多。有人力資源顧問公司表示，對俄羅斯嘅制裁方案使業界人士工作量激增，因為需要篩選審查嘅個案太多，又預計未來制裁專家呢個工種會喺全球渴市。
至於如何抓出受制裁人士嘅可疑交易？美國財政部金融犯罪執法網絡（FinCEN）就受制裁嘅俄羅斯精英可能尋求逃避制裁嘅途徑向金融機構提出建議，並列出可能有助於識別潛在可疑交易嘅警示信號。
FinCEN稱，其他高價值資產可能被用來逃避制裁，如藝術品、豪華遊艇和車輛以及貴金屬、寶石或珠寶，並建議注意全現金交易或使用空殼公司進行嘅交易。FinCEN還宣布啟動「資產追回獎勵計劃」，對於幫助追回流出國外嘅犯罪資產嘅有用資訊，給予最高500萬美元嘅獎勵。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
