昔日東方絲絲講場：印度神童預言：4/4經濟困境惡化 13/4白銀價格破頂
呢期熱爆全城嘅印度神童阿南德（Abhigya Anand），早前預言3月16日係金融市場關鍵日子！竟然，連日急挫嘅港股，尋日作出重大修正，單日暴升超過1,600點，令人感受到呢位真係非一般嘅「神童」！絲絲同大家一樣，最關心嘅，當然係跟住會點發展。阿南德提到，下兩個關鍵日期係4月4日及4月13日，前者經濟面臨嘅問題會更嚴峻，後者則會見到黃金同白銀價格大漲，其中白銀價格更會創歷史新高，信不信由你！
阿南德又提到，喺巨變之下，若然繼續富者愈富、貧者愈貧，經濟將會持續混亂。如是者，相信大家都好想知道，可唔可以避開呢個惡性循環？不過，按照尋日亞洲開發銀行公布嘅報告所講，似乎情況並唔樂觀。
亞開行：東南亞極貧困人口增470萬
亞開行研究話，舊年新冠肺炎疫情大流行，令東南亞嘅極度貧困人口增加470萬，更有930萬個工作職位消失。何謂極度貧困？即係每日生活費不足1.9美元（約14.8港元）。呢個價碼喺香港，只可以勉強去麥記買個包食。
喺東南亞，去年極度貧困人口多達2,430萬，佔整個地區總人口約3.7%。亞開行話，係因為疫情導致廣泛失業，加劇區內不平等同貧困程度，尤其係女性、年輕工人同老人家，暫料今年東南亞地區嘅經濟增長預測有5.1%，惟若Omicron再度擴散，同時引發供需衝擊，區內經濟增長預計將減少多達0.8個百分點。但呢個預測，仲未計埋俄烏衝突嘅經濟影響。
不幸嘅係，中國作為整個東南亞地區嘅經濟引擎，目前正受疫情衝擊。雖然尋日內地部門通報，周二新增本地確診病例按日回落，但料疫情受控需時，暫未知對內地經濟造成幾大傷害。
身為升斗市民，當然想疫情快啲過去，大家可以重過正常生活。最重要係，社會可以更公平一啲，貧富懸殊情況得以改善，減少社會戾氣。學阿南德話齋，改善貧富懸殊情況，經濟先至唔會繼續混亂落去，對大家都有利。聽落，絲絲又諗起近年內地提倡嘅「共同富裕」，睇嚟先知與強者，都係英雄所見略同……
本文連結 : https://orientaldaily.on.cc/content/產經/odn-20220317-0317_00202_036/絲絲講場：印度神童預言：4-4經濟困境惡化-13-4白銀價格破頂
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
