絲絲講場：投行闊綽 港員工「因疫得福」

最近唔少防疫物資搶到貴晒，高盛將向在港員工提供防疫津貼，上限1,000元，實報實銷，幫補吓員工採購日常防疫用品開支。金額話多唔多，話少唔少，畢竟口罩、快速檢測套裝、消毒用品等等，買吓買吓都唔少錢。

唔止咁，就連員工子女都有受惠。事關學童突然提早放「暑假」，無旅行去，又無遊學團，一眾家長安排「暑期活動」頭都痛埋。高盛將為家長員工提供課外活動津貼，每名子女每周最多1,000元。解決咗員工嘅煩惱，咁就可以繼續安心工作，雙贏！

摩根大通就派1,800元，提高員工士氣。發言人仲話，等疫情完結之後，員工可以同屋企人食餐好喎！不過，呢日可能要等到頸都長。望吓條街，疫情未清零，周街食肆已邁向清零，開番堂食之時，唔知有幾多餐廳可以賺呢1,800個大洋呢？

除咗錢銀咁實際嘅政策，仲有其他招數嘅。高盛話，確診個案不斷上升，將延長疫情下家庭假期至6月底，畀員工可以照顧受影響家人，唔使心掛掛。另外，陪家人打針，仲有半日假期。

聽到係咪覺得好吸引呢！至於中資行有咩防疫福利？絲絲要再努力啲八卦下先得，估計至少一定有居家工作安排嘅。