絲絲講場：烏國副總理踩盧布Cheap過狗狗幣

「狗狗幣價值超越盧布」真係可圈可點，交易平台CryptoCompare數據顯示，尋日每枚狗狗幣價格報0.1317美元，而盧布兌每美元僅0.0088。絲絲諗副總理就應該睇漏咗個「小數點」啦，依家每枚狗狗幣就已經可以兌換到15盧布。

事實上，早喺舊年初狗狗幣迎來第一輪升勢之後，佢嘅幣價已經超越盧布；直至近期俄國揮軍後，盧布匯價大幅貶值令情況更加明顯。所以，絲絲相信「超越盧布」只係一場心理戰，係貶低盧布之餘，又可以氹幣圈解囊捐款！

區塊鏈分析公司Elliptic資料顯示，自從俄國入侵烏克蘭，烏國政府及其他非政府組織已獲得逾3.5萬筆虛擬資產捐款，累計籌資總額達到3,500萬美元；當中涉及39.78萬枚狗狗幣，價值約5.3萬美元。

不過，虛擬貨幣猶如「雙面刃」，既可幫助烏克蘭資金上解困，亦可被俄國利用作為協助逃避西方國家制裁嘅工具。據報，因為虛擬貨幣「去中心化」嘅特性，俄羅斯政府或可以通過虛擬貨幣進行交易，以避開無得使用環球銀行金融電訊協會（SWIFT）支付系統嘅局面。所以，美國政府已經要求虛擬貨幣交易所，確保被制裁嘅俄國戶口無法進行交易。