昔日東方絲絲講場：VR睇波不是夢 元宇宙球場將面世
親臨現場為愛隊助威可能係每個球迷嘅夢想，但因為疫情關係，有好多人都只係可以隔住電視吶喊。不過，遲啲可能喺自己屋企都有現場嘅效果！事緣近日英格蘭超級足球聯賽衞冕冠軍曼城宣布，會同日本電子巨企索尼（Sony）合作，建設世界上第一個「元宇宙」足球場。
曼城與Sony合作建設
外媒報道，雙方已經簽署一份為期3年嘅協議，Sony專家團隊已經到訪曼城主場阿提哈德球場（Etihad Stadium），進行一系列數據監測，並開始建置虛擬實境（VR）版本嘅曼城主場。曼城官方就表示，希望球迷可以唔受空間、地域等限制，都能夠喺屋企享受現場比賽。
足球迷就當然興奮啦！之不過，英超好多嘅比賽時間都喺香港深夜時間，依絲絲話用「元宇宙」睇波前，最好就做番好屋企個隔音，費事嘈醒另一半或者隔籬屋嘅鄰居，擾人清夢就唔好啦！
曼城首席營運總監Nuria Tarre表示，創造「元宇宙」足球場嘅目的，係希望為球迷提供另一觀賽角度，亦希望全球球迷可以「塞滿」虛擬場館。佢仲話，球圈內事情變化太快，認為「元宇宙」可以挑戰現時電視轉播比賽嘅形式同地位，令到球會可以繞過電視台，直接將比賽用直播「門票」形式賣畀球迷。
或推NFT產品畀球迷追星
另外，該會亦研究用「元宇宙」追星，畀球迷喺虛擬世界中同球員見面，仲講明會推出「喺現實世界中無法獲得嘅產品」，雖然會方無講明係咩，但唔難理解應該係啲NFT（非同質化代幣）產品。
事實上，疫情重挫歐洲球會收入，尤其係社交隔離措施之下，入場觀眾大減，令佢哋不得不另覓「財路」。據報，作為同市宿敵嘅曼聯早於月初宣布，會同虛擬貨幣交易平台Tozos合作進軍虛擬貨幣市場；另一英超勁旅利物浦更考慮會倣效曼城，建設「元宇宙」球場，以增加球會收入。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
