絲絲講場：華補習龍頭：過了最靜寒假

為應對補教業寒冬，早前俞敏洪雄心壯志帶領新東方在綫(01797)轉戰促銷農產品直播帶貨嘅新領域。可惜今年內地農曆新年假期因新冠肺炎疫情關係，直播帶貨都顯得力不從心。佢喺社交平台透露，由於農產品供應鏈同物流跟唔上，新東方在綫創立嘅「東方甄選」都停止咗直播。雖然節後已經復工，但直播仍要慢慢恢復起嚟，開始一場「新的長征」，甚至係一場「駱駝穿越沙漠的堅韌跋涉」，內心亦非表面上嘅沉靜從容，反而總是充滿時不予我嘅焦慮。

原本錢財乃身外物，身體健康最實際，但禍不單行嘅係，新年期間俞氏曾不適入院「打了4個小時點滴」。事緣佢偶有參加朋友相聚嘅新年飯局，「席間就喝了一點點紅酒。但餐後一小時，開始腸胃翻江倒海難受，不斷嘔吐，直到吐出來膽汁苦水，還是沒有止住」，佢更一度懷疑自己係食物中毒。

話鋒一轉，俞敏洪似安慰自己，以「也許昨天的雪，是這個冬天的最後一場雪」、「春天很快來到」輕輕作結。值得留意，內地公司註冊資料顯示，新東方旗下間接全資持股的廣州匯智未來數字科技成立，註冊資本100萬元人民幣，經營範圍包括項目策劃與公關服務、文化藝術經紀代理、數碼文化創意內容應用服務、電子產品銷售等，會唔會又有咩新諗頭，且拭目以待。