絲絲講場：富豪告麥當勞供應商養豬唔人道

外媒報道，艾肯認為問題出在麥當勞嘅豬供應商用咗「妊娠箱」，係用嚟限制懷孕母豬行動嘅籠仔，講到呢度，佢話：「一諗到豬隻受到不必要折磨，就令我感到激動」。而麥當勞早喺2012年時，就承諾喺2022年之後唔會再用。艾肯同其他人道組織發現，雖然麥當勞叫供應商一發現母豬大肚，就要將其遷出「妊娠箱」，但好多豬農到母豬懷孕4至6周先至咁做（母豬懷孕期為16周）。

麥當勞所採購嘅豬佔美國豬肉產量大約1%，但喺美國冇飼養母豬，亦冇生產或包裝豬肉。麥當勞表示，到今年底，預計美國豬肉量有85至90%來自懷孕期間冇住過妊娠箱中嘅母豬。到2024年底，所用嘅美國豬肉將100%將來自懷孕期間成群飼養嘅母豬。

呢位慈悲為懷嘅激進維權投資者艾肯揸住200股麥當勞美股，價值5萬美元（約39萬港元），咁少股份都提名兩個董事人選入局，個槓桿都幾大喎。被提名嘅都係來自關注動物權益嘅公司高層。話埋畀你知，艾肯長期投入股東會之爭，而且經常做贏家。