絲絲講場：比亞迪換Logo唔老利？

事緣比亞迪公布，其品牌進行煥新升級，並發布新Logo。旗下嘅比亞迪汽車亦對Logo進行升級，變得更加簡約流暢醒目，亦更具科技感咁話！今次公布嘅新Logo將喺旗下電子、新能源、軌道交通及汽車產業中使用。與此同時，汽車產業嘅乘用車板塊各品牌將使用各自嘅品牌Logo。

公布完換新Logo後，比亞迪股價尋日明顯受壓，曾低見245元，收報246.2元，跌2.91%。咁搞法，又真係唔多「老利」！

仲記得之前小米集團(01810)自稱創作歷時3年、用咗兩百萬人仔更換嘅新Logo，由於望落去分別唔太大，故令網友嘖嘖稱奇，議論紛紛。對於比亞迪嘅新舊Logo，網民都好奇想知公司使咗幾多錢，到底望落去分別大唔大，係咪真係「更醒目」同「更具科技感」，就等大家評吓啦！