絲絲講場：庫克天價花紅招人妒

外媒報道，股東投票顧問服務機構Institutional Shareholder Services（ISS）指出，庫克舊年嘅薪酬獎勵金額已經大大超越其他同業，股權獎勵嘅設計以及規模又存在重大隱憂，加上有一半獎勵缺乏績效標準，所以認為Apple嘅股東有必要投票反對呢項提議。

當然，ISS嘅建議只係諮詢性質，僅供股東參考，最終決定權仍掌握喺Apple董事會手中，而公司年度股東大會將於3月4日舉行，勢成市場焦點。

資料顯示，庫克自2011年起擔任CEO，喺2021年首次攞到股權獎勵，全年嘅薪酬獎勵包括價值8,230萬美元股票、300萬美元薪金同1,200萬美元現金花紅，若加上其他費用，全年薪酬獎勵金額總計約9,900萬美元（約7.72億港元），以現時Apple官網最大容量iPhone 13每部9,299港元計，相等於約8.3萬部iPhone 13。

不過，公道啲講，庫克領導Apple咁耐，交得出成績，公司市值接連突破一萬億美元、兩萬億美元、3萬億美元，股東身家水漲船高，確實係好Happy，相對區區近一億美元嘅CEO年終薪酬獎勵，又絕對值回票價嘅！