絲絲講場：林慧虹坐正滙豐香港區一姐

喺佢寫畀同事嘅內部信入面，講到自己早喺20年前就加入新加坡滙豐，開始咗一段奇妙嘅「冒險旅程」，期間踏足過內地、印尼、馬來西亞、越南，2017年嚟到香港擔任香港區營運總監。

Luanne話會積極推動3大範疇：釋放香港的戰略價值以促進增長、聯繫員工同埋做好「香港銀行」嘅角色；並深化跨業務合作，利用創新以改善客戶體驗，喺大灣區同數碼銀行等快速增長領域佔領市場份額，並部署喺可持續融資方面嘅能力，以幫助客戶過渡同轉型。

除咗銀行業務發展之外，Luanne喺信中亦有透露，佢非常之享受喺香港嘅生活，過得好充實，仲好鍾意做戶外活動喎。呢位滙豐香港區嘅一姐果然係動靜皆宜！另外，Luanne話閒時有做瑜伽，因為可以畀到佢幸福同腳踏實地嘅力量。佢亦都相信科技嘅力量，相信科技將會係銀行業嘅未來關鍵。

滙豐銀行聯席行政總裁廖宜建對Luanne都讚不絕口，認為佢喺過去6個月署任期間，展現非凡的領導才能，相當適合擔任香港區行政總裁一職。無論係推進業務發展或優化營運方面都表現卓越，以佢嘅幹勁同執行能力，一定可以令香港業務持續增長。

林慧虹又表示，十分榮幸有機會領導滙豐香港，正值集團加快喺亞洲嘅投資。滙豐計劃未來5年喺亞洲投資超過60億美元，集中拓展財富管理和批發銀行業務，同時把握區內中產階級增長潛力，滿足邁向低碳經濟嘅融資需求。

另方面，外媒報道，滙豐擬將部分初級銀行家花紅倍增，以應付全球人才競爭。

此外，現年61歲的滙豐銀行香港區前總裁馮婉眉（Anita）市傳將會重返本地銀行業，出任中銀香港獨立非執行董事。