絲絲講場：網紅愛企新一年「裁員廣進」

重災區首先就要北望神州，內地連鎖茶飲品牌喜茶日前傳出裁員消息，涉及多達30%員工，部分部門甚至傳被成個裁走。多名喜茶員工向內媒透露裁員消息，仲話新年前就已經開始裁員。過完年後，仲會再裁一部分員工，訊息安全部門一個不留，門店拓展部門被裁一半人，被裁嘅員工將得到正常N+1（多一個月人工）補償，亦可以選擇內部調去其他部門。莫非紅極一時嘅奶茶店，最後竟然係泡沫？

市場就估計係同喜茶計劃今年赴港上市，想改善財報有關，但喜茶負責人回應話「傳聞皆為不實訊息」，公司不存在所謂大裁員情況，年前「小量的人員調整」為基於年終考核嘅正常人員調整同優化。喜茶前排仲大幅減價，外界解讀為喜茶想提高客單量，等財務數據「更靚仔」。

另一間「網紅」企業係美國健身器材公司Peloton，宣布裁員約2,800人，佔全部員工嘅20%，幫公司每年節省8億美元成本，唔慌唔大幅瘦身喇。呢間公司近兩年因為居家健身趨勢都曾經風光過吓，不過，依家歐美都放寬晒防疫，對網上健身嘅需求急劇下降，於是Peloton漸漸冇運行。

有美企唔知係贈興定雪中送炭，來自亞馬遜同Spotify等公司招聘人員就對其他企業嘅被裁員工表示同情，仲附上搵工建議，話若然都係搵唔到工，可以寄工作推薦同推薦信去申請職位試試咁話，希望被裁員工冇咁徬徨啦。